آغاز میں

جدید صنعتی دنیا کا ایک اصطلاحی نام ہے جس کو ٹرن-کی-پراجیکٹ (Turn-key-project) کہا جاتا ہے۔ اس سے مراد ایک ایسا مکمل طور پر بنا بنایا گھر یا کارخانہ ہے جس میں آدمی کا کام صرف چابی گھمانا ہوتا ہے۔ مسلمان موجودہ زمانے میں جس طرح کام کر رہے ہیں اس کو دیکھ کر ایسا معلوم ہوتا ہے گویا وہ دنیا کو اپنے لیے اسی قسم کی ایک جگہ سمجھتے ہیں۔ ان کا خیال شاید یہ ہے کہ ان کے خدا نے ایک تیار شدہ دنیا ان کے حوالے کر دی ہے اور اب ان کا کام صرف یہ ہے کہ چابی گھمائیں اور اس کو اپنی مرضی کے مطابق چلا دیں۔

مگر یہ سراسر نادانی ہے۔ حقیقت یہ ہے کہ دنیا عمل اور مقابلہ کی دنیا ہے۔ یہاں ہمیں اول سے آخر تک سارا کام خود کرنا ہے۔ ہمیں دوسروں کا مقابلہ کرتے ہوئے زندگی کا ثبوت دینا ہے۔ اس کے بعد ہی یہ ممکن ہے کہ اس دنیا میں ہمیں اپنی مطلوبہ جگہ مل سکے۔

موجودہ زمانے کے مسلمانوں کو سب سے پہلے جو چیز جاننے کی ضرورت ہے وہ یہ حقیقت ہے کہ وہ تاریخ کے آغاز میں ہیں، نہ کہ تاریخ کے اختتام میں۔ ہر آدمی جانتا ہے کہ اگر وہ جنوری میں ہو تو دسمبر تک پہنچنے کے لیے اسے 12 ماہ کا انتظار کرنا پڑے گا۔ اس سے پہلے وہ لقمہ نہیں کھا سکتا جو اسے دسمبر میں ملنا ہے۔

یہ اس دنیا کی ایک انتہائی معلوم حقیقت ہے، مگر اس معلوم حقیقت کو مسلمان اب بالکل بھول گئے ہیں۔ وہ پہلے مہینے میں ہوتے ہیں اور چاہتے ہیں کہ چھلانگ لگا کر آخری مہینے میں پہنچ جائیں۔ وہ بنیاد کی تعمیر نہیں کرے اور چاہتے ہیں کہ وہ اپنے خیالی مکان کی بالائی چھت پر کھڑے نظر آئیں ۔

یاد رکھیے کہ ہمارا سب سے پہلا کام یہ ہے کہ ہم ایک با مقصد قوم تیار کریں۔ ہمیں قوم کے افراد کو وہ تعلیم دینا ہے جس سے وہ ماضی اور حال کو پہچانیں۔ ان کے اندر وہ شعور بیدار کرنا ہے کہ وہ اختلاف کے باوجود متحد ہونا جانیں۔ ان کے اندر وہ حوصلہ ابھارنا ہے کہ وہ ذاتی مفاد اور وقتی جذبات سے اوپر اٹھ کر قربانی دے سکیں۔ یہ سارے کام جب قابل لحاظ حد تک ہو چکے ہوں گے، اس کے بعد ہی کوئی ایسا اقدام کیا جا سکتا ہے جو فی الواقع ہمارے لیے نئی تاریخ پیدا کرنے والا ہو۔ اس سے پہلے اقدام کرنا صرف موت کی خندق میں چھلانگ لگانا ہے نہ کہ زندگی کے چمن میں داخل ہونا۔