سنبھل کر چلیے

چھوٹے جانوروں کو جب ندی پار کرنی ہو تو وہ تیزی سے دوڑ کر نکل جاتے ہیں، ان کے لیے کوئی خطرہ نہیں ہوتا. لیکن ہاتھی جب کسی ندی کو پار کرتا ہے تو وہ تیزی سے چلنے کے بجائے ہر ہر قدم پر رک رک کر چلتا ہے۔ وہ اپنا ہر قدم نہایت احتیاط سے رکھتا ہوا آگے بڑھتا ہے۔ اس فرق کی وجہ یہ ہے کہ ہاتھی ایک غیر معمولی طور پر وزنی جانور ہے، اور اس کے لیے یہ خطرہ ہوتا ہے کہ ندی کی گاد (کیچڑ) میں کہیں اس کا پاؤں نہ دھنس جائے، کیونکہ اگر ایسا ہوا تو اس کے لیے وہاں سے نکلنا مشکل ہو جائے گا۔

یہی وجہ ہے کہ ہاتھی جب تک یہ نہ دیکھ لے کہ اس کے قدموں تلے سطح مضبوط ہے، وہ اپنا پاؤں آگے نہیں بڑھاتا۔ وہ سب سے پہلے اپنا پاؤں ہلکا سا رکھ کر زمین کی سختی یا نرمی کا اندازہ کرتا ہے، اور جب اسے یقین ہو جاتا ہے کہ زمین اسے سنبھال سکتی ہے، تبھی وہ اپنا پورا وزن اس پر ڈالتا ہے اور آگے بڑھتا ہے۔ اس کو یہ طریقہ کس نے سکھایا؟ اس کا جواب ہے کہ اسے اللہ نے یہ سوجھ بوجھ عطا کی ہے، یعنی اس کے فطری عمل کو خدائی تائید حاصل ہے۔

گویا انسانی زندگی کے لیے خدائی سبق یہ ہے کہ جب راستے میں خطرات ہوں تو لاپرواہی کے بجائے احتیاط سے کام لیا جائے۔ راستے کے اتار چڑھاؤ کو دیکھ کر سنبھل سنبھل کر قدم رکھا جائے۔ انسان کو تو اللہ نے ہاتھی سے بھی زیادہ عقل دی ہے۔ جہاں بارود کے ذخیرے ہوں، وہاں کوئی عقلمند آدمی ماچس نہیں جلاتا، یا پٹرول کے ٹینکرز کے قریب کوئی ڈرائیور لاپرواہی سے سگریٹ نہیں پیتا۔

مگر اکثر لوگ معاشرتی زندگی میں اس اصول کو فراموش کر دیتے ہیں۔ معاشرے میں طرح طرح کے لوگ ہوتے ہیں جو مختلف حالات پیدا کرتے ہیں۔ کہیں "دلدل" ہوتی ہے اور کہیں "پٹرول"، کہیں "کانٹا" ہوتا ہے اور کہیں "گڑھا"۔ عقلمند وہ ہے جو ایسے نازک مواقع پر الجھنے کے بجائے بچ نکلے، تاکہ اس کا رخ اپنے اصل مقصد کی طرف رہے۔ جس کے سامنے کوئی بڑا نشانہ ہو، وہ چھوٹی چھوٹی باتوں میں نہیں الجھتا کیونکہ وہ جانتا ہے کہ کسی سے بھی الجھنا اسے اپنے مقصد سے دور کر دے گا۔ بامقصد آدمی کی توجہ ہمیشہ اپنی منزل پر ہوتی ہے، وہ وقتی معاملات کے بجائے مستقل نتائج پر غور کرتا ہے۔