گم شدہ اونٹ

حضرت ابراہیم بن ادہم رحمۃ اللہ علیہ سلطنت کے بادشاہ تھے۔ ایک رات کا ذکر ہے کہ آپ اپنے محل میں سو رہے تھے، آدھی رات کے وقت چھت پر کھڑ کھڑاہٹ اور شور و غل کی آواز آئی۔ آپ کی آنکھ کھل گئی، غور سے کان لگا کر سنا تو یوں محسوس ہو رہا تھا جیسے چھت پر بھاری بھاری قدموں سے کوئی چل رہا ہے۔

حضرت ابراہیم ادہم رحمتہ اللہ علیہ نے دل میں سوچا کہ یہ کس کی جرات ہے جو آدھی رات کے وقت محل کی چھت پر چل رہا ہے؟ یقیناً یہ کوئی غیر معمولی اور ہمت والا انسان ہے۔ آپ نے محل کی کھڑکی کھولی، اپنی گردن باہر نکالی اور چھت کی طرف منہ کر کے اونچی آواز میں پکارا: "کون ہے وہاں؟"

چھت سے لوگوں نے سر نیچے کر کے جواب دیا: "ہم رات کے اس وقت اپنی کسی چیز کی تلاش میں پھر رہے ہیں۔" حضرت ابراہیم ادہم رحمہ اللہ نے حیران ہو کر پوچھا: "تم کیا تلاش کر رہے ہو؟" وہ کہنے لگے: "ہم اپنے گم شدہ اونٹ کو تلاش کر رہے ہیں۔"

حضرت ابراہیم ادہم رحمتہ اللہ علیہ نے فرمایا: "کیا کبھی کسی نے گم شدہ اونٹ کو محل کی چھت پر بھی تلاش کیا ہے؟" یہ سن کر وہ برجمستہ (فوراً) بولے: "کیا کسی نے بادشاہی کے شاہانہ ماحول میں، تاج و تخت کی موجودگی میں فقیری (اللہ کی قربت و معرفت) کو تلاش کیا ہے؟"

یہ سننا تھا کہ حضرت ابراہیم ادہم رحمۃ اللہ علیہ پر عجیب سکتہ اور بے خودی کی کیفیت طاری ہو گئی۔ اس بات نے آپ کے دل پر ایسا گہرا اثر کیا کہ اسی وقت سب کچھ چھوڑ چھاڑ کر پہاڑوں کی طرف نکل گئے، اور دنیا سے الگ تھلگ ہو کر اللہ تعالیٰ کی عبادت میں مشغول ہو گئے۔