نمازی غلام
اگلے وقتوں میں کہیں ایک امیر بڑا نیک خواہ اور قابل تھا۔ مگر شامت اعمال سے اس میں کاہلی (سستی) بہت تھی۔ دینی امور میں وہ اور بھی غافل تھا۔ خالق کے آگے سربسجود ہونے سے وہ بہت دم چراتا اور بھول کر بھی مسجد میں قدم نہ رکھتا۔ اس کا ایک منہ چڑھا غلام چستی اور دینداری میں بالکل آقا کی ضد تھا۔
ایک صبح غسل کا ارادہ کر کے آقا حمام کی جانب تیل، رومال اور صابن لے کر روانہ ہوا۔ راہ میں مسجد سے اذان کی آواز آئی۔ غلام نے کہا: "آقا! مجھے فجر کی دو رکعتیں پڑھنے کی اجازت دیجیے۔ میں ابھی فارغ ہو کر واپس آتا ہوں۔"
امیر نے کہا: "میری طرف سے دو فرض ادا کرنے کی رخصت ہے۔ میں باہر بیٹھا ہوں۔ میرے لیے بھی دعا کرنا۔"
امیر نے گھڑی بھر انتظار کیا مگر غلام نہ آیا اور سب نمازی فارغ ہو کر نکل آئے۔ ایک گھڑی اور انتظار کر کے امیر نے درِ مسجد پر جا کر آواز دی کہ: "اے غلام! تیرا دامن وہاں کس نے سی دیا؟"
غلام بولا: "ایک ساعت ٹھہریے۔ مجھے وہی باہر آنے سے روکتا ہے جو تجھے اندر نہیں آنے دیتا۔"
یعنی سب کچھ اللہ ہی کے دستِ قدرت میں ہے۔ حیلہ و تدبیر سے کچھ نہیں ہو سکتا۔ جو انسان خودی چھوڑ دے وہی واصل باللہ ہو کر بقا حاصل کر سکتا ہے۔
نتیجہ / سبق
1۔ توفیقِ الٰہی: نماز اور عبادت صرف انسان کی اپنی مرضی یا تدبیر سے نہیں ہوتی بلکہ یہ صرف اللہ تعالیٰ کی توفیق اور کرم سے ممکن ہوتی ہے۔ اگر اللہ کی توفیق نہ ہو تو انسان مسجد کے در پر کھڑا ہو کر بھی اندر نہیں جا سکتا۔
2۔ دل کا قید ہونا: جو شخص گناہوں یا غفلت میں مبتلا ہوتا ہے، اس کے قدم اور دل نیکی کی طرف اٹھنے سے قاصر رہتے ہیں، جبکہ سچا باطنی تعلق انسان کو مسجد میں اللہ کے حضور جوڑ کر رکھتا ہے۔
3۔ ترجیحات کی اصلاح: دنیاوی کاموں (مثلاً حمام یا دیگر مصروفیات) سے زیادہ اہمیت اللہ کے احکام اور نماز کو دینی چاہیے۔
4۔ نفیٔ خودی: انسان کو اپنی تدبیر اور غرور چھوڑ کر مکمل طور پر اللہ تعالیٰ کے سامنے عاجزی اختیار کرنی چاہیے، اس میں انسان کو بقا اور قربِ الٰہی حاصل ہوتا ہے۔
(حکایاتِ رومی)
