قدر نعمت و عافیت

ایک بادشاہ ایک عجم (غیر عرب) غلام کے ساتھ کشتی میں بیٹھا ہوا تھا۔ اس غلام نے اس سے پہلے کبھی دریا نہیں دیکھا تھا اور نہ ہی کبھی کشتی کے سفر کی تکلیف اور خوف کا تجربہ کیا تھا۔ اس نے خوف کے مارے رونا اور چلانا شروع کر دیا اور اس کے جسم پر کپکپی طاری ہو گئی۔ اس کی اس حالت سے بادشاہ کا آرام و سکون اور خوشگواری تلخ ہو گئی، کیونکہ بادشاہ کی نازک طبیعت اس طرح کی باتوں اور شور شرابے کو برداشت نہیں کر سکتی تھی، لیکن اس کو خاموش کرانے کی کوئی ترکیب کسی کی سمجھ میں نہیں آ رہی تھی۔

اسی کشتی میں ایک عقلمند اور دانا شخص بھی موجود تھا۔ اس نے بادشاہ سے عرض کیا: "اگر آپ حکم دیں تو میں ایک طریقے سے اسے خاموش کروا دیتا ہوں؟" بادشاہ نے کہا: "یہ تو آپ کی بہت بڑی مہربانی اور عنایت ہو گی۔"

عقلمند شخص کے حکم پر ملازموں نے غلام کو دریا کے پانی میں پھینک دیا۔ اس نے پانی میں کئی غوطے کھائے، پھر اس کے بالوں سے پکڑ کر اسے واپس کشتی کے قریب لائے۔ اس نے اپنے دونوں ہاتھوں سے کشتی کا دنبالہ یعنی پچھلا حصہ مضبوطی سے پکڑ لیا اور اوپر چڑھ آیا۔ اس کے بعد وہ کشتی کے ایک کونے میں جا کر سکون و آرام سے بیٹھ گیا۔

بادشاہ کو بہت تعجب اور حیرت ہوئی، اس نے پوچھا: "اس تدبیر میں کیا حکمت اور راز تھا؟" عقلمند شخص نے جواب دیا:

"اس غلام نے اس سے پہلے ڈوبنے اور غرق ہونے کی تکلیف نہیں دیکھی تھی، اس لیے اسے کشتی پر سلامتی اور حفاظت سے رہنے کی قدر معلوم نہیں تھی۔ اسی طرح انسان کو اپنی عافیت اور سلامتی کی قدر اس وقت تک معلوم نہیں ہوتی جب تک وہ کسی مصیبت میں گرفتار نہ ہو جائے۔"