مور کے پر

ایک مور جنگل میں کھڑا اپنے خوبصورت پر نوچ کر پھینک رہا تھا۔ ایک دانشمند شخص نے یہ دیکھا تو بہت حیران ہوا اور بولا: "اے مور! تیرا دل یہ کیسے برداشت کرتا ہے کہ تو اپنے اتنے خوبصورت پروں کو اکھاڑ کر پھینک رہا ہے؟ کیا تجھے معلوم نہیں کہ لوگ ان پروں کو کتنے شوق اور احترام سے اٹھا کر قرآن مجید جیسی مقدس کتابوں کے اندر رکھتے ہیں؟ اور محبوب لوگ ان کے پنکھے بنا کر اپنے خوبصورت چہروں کو ہوا دیتے ہیں؟ یہ تو تیری طرف سے بڑی ناشکری اور بے ادبی ہے کہ تو خدا کی بنائی ہوئی اتنی خوبصورت چیز کو اس طرح ضائع کر رہا ہے۔"

مور یہ سن کر خاموش رہا اور کچھ نہ بولا، لیکن اس کی آنکھوں سے خود بخود آنسو بہنے لگے۔ چونکہ وہ دانا شخص بھی دردمند دل رکھتا تھا، اس لیے مور کو روتا دیکھ کر وہ بھی متاثر ہو گیا۔ جب آنکھوں کے راستے مور کے دل کی بھڑاس نکل گئی تو وہ بولا: "اے عقلمند انسان! اب میری بات بھی سن لے! تو میرے خوبصورت پروں کو دیکھتا ہے، لیکن میں اپنے عیبوں (اور خامیوں) کو دیکھ کر رو رہا ہوں۔ نہ تو میرے گوشت میں کوئی ذائقہ ہے اور نہ ہی میرے پاؤں خوبصورت ہیں، جبکہ لوگ صرف میرے پروں کی تعریف کرتے ہیں۔ میرے یہ پر ہی میری مصیبت بن چکے ہیں، کیونکہ انہی کی وجہ سے شکاری میری تلاش میں رہتے ہیں اور مجھے مار دیتے ہیں۔ کاش! گوشت اور پاؤں کی طرح میرے پر بھی بدصورت ہوتے، اور میری گردن بھی بدنما ہوتی تاکہ میں شکاریوں کا نشانہ نہ بنتا۔ میں اپنے پروں کو خود اس لیے توڑ کر پھینک رہا ہوں تاکہ شکاری مجھے بے پر اور بدصورت دیکھ کر میری جان لینے کے پیچھے نہ پڑیں۔"